Maanso cusub oo ka hadlaysa xaalada dalka oo uu tiriyey Abwaan Xasan Daahir Ismaaciil Weedhsame Akhris iyo dhagaysi Wacan
Halkan Guji si aad u dhagaysato Maansada Mudduci
Mudduci
Goortii cid kuu maqan
Ama aad u tahay magan
Miyir quustay maan arag
Iyo mooyi igu yidhi
Madhxiyaay raggaad tidhi
Madhiyaay inuu yidhi
Goortaan ka marag kacay
Xildhibaan mitidi laa
Danta guud matali laa
Mawlaha ka biqi laa
Maatada u nixi laa
Maalintuu u baahnaa
Milicdey tubnaayeen
Maankiisu garan laa
Goortuu muraadsadey
Marinkiisi baal maray
U maleegtay ganacsade
Milgihiisa iibiya
Adna uu ku maax tiray
Maansada walaaca ah
Maqaleey warlaayda ah
Tixdan muusanawga ah
Anna mari xil baa I leh
Adna maqal dan baa ku leh.
Ummadyahay muqlaysani
Ummadyahay masiirkiyo
Arrinkeeda mooggani
Ummadyahay masayrkiyo
Murankiyo xinkeedii
Isu muuqda uu yidhi
Ummadyahay maroodiga
Sidiisii nin maagani
Mirashada ku gaadaa
Gobannimo ma magac baa?
Ma maqaar gondaalaa
Ma is mooro duug baa
Ma ma-guurtadaadii
Toban qoys u moos baa
Musuq iyo ma tuugaa
Ma hankaaga maydhoo
Hibashada miciinsaa
Ma hagaasi maankoo
Garashada maxbuus baa
Miyirkiyo damiirkiyo
Madadkiyo dareenkii
Ma ha maahsanaadaa?
Nin xalay mirtii dhexe
Makhalkaaga soo xaday
Aan maydhax kaga tegin,
Adoo muunidii hore
Gartay maalku kaagii
Inu yahay madluunoow
iyadoonay murugiyo
Kaa muuqan tabashadu
Tuuggii mahoobiyey
Caku may caskaagii
Sidii xayn u muruqiyo
Mihnadiisa ku tabcaday
Midigtaada hoos dhigo
Oo weliba muuniyo
Mahad-celin ku taartaar
Weedh lagu majeertiyo
Ammaan aan murkucanayn
Welibana u miis miis
Nin xalaasha miirtiyo
Xalay-dhalay ku maamuus
Durba inu macsuum yahay
Waa kaa is moodee
Adigoo mulkiile ah
Wuxu kaa maroorsaday
Manno kuugu sheegtee
Ma nimaad markhaatiga
Madal ugu furteen baa
Loo maaro helayaa?
Mooyahaan hadhuudhkiyo
Mesegada ku tumayaa
Shaw moqorro yeeshoo
Mar kastoon milaalaba
Shaw wuu murdinayaa
Anna midho waxaan laa
Shaw waan u madhayaa!!
Inu hebel macaashiyo
Inu hebel mashruuc helo
Xeerar loo malmalay iyo
Dawlad lagu masruufayo
Qoysas aan marganinoo
Malafsiga xalaashaday
Mashaqiyo dhib weynaa
Macal-weynta boobkiyo
Dhaca mooday xoogsiga
Mudanaha dhimbiishiyo
Booliga ku mayracay
Xaaskiyo min-weyntii
Ninka mahayo-mooggii
Ubadkiisii maydhnaa
Ku masruufay xaaraan.
Anigaa markhaatiya
Mareegaale tuugiyo
Mannaxaan inuu yahay.
Wax la yidhi qof muuqdiyo
Middi saawiroo taal
Midna lagama quustee,
Caku mudanahaygii
Mooryaantu dhaantoow
Dhiig miirtihiiyoow
Kii loo mashxaradee
Isna nagu maqnaayee
Quus nagu macsuumoow
Milladii islaamkiyo
Dhaartaad marteeniyo
Xaqa muuminiintiyo
Ducadii madluunkee
Toos loo maqlaayiyo
Mawdkiyo xabaashiyo
Qabrigii madoobaa
Ee maro cad mooyee
Maal lala tegayniyo
Muduciga qiyaamaha
Maxkamada ilaahay
Kugu maadsanaayiyo
Xaaraanta maandhow
Cishadaa macaanayd
Muruqaad ku xoogtiyo
Midigtaad ku taabtiyo
Dhuuntaa ad marisee
Kugu marag furaysiyo
Mustafaha warkiisii
Moogaha illaawoow.
Magac dhawristii iyo
Dhaqankii masuulnimo
Xilkaskiyo marwaadkii
Maydhaamihiiyoow
Maahmaah horaa tidhi
“Nimay soori malagtiyo
Nimay seefi mirataa
Maso weeyi weligood”
Muurmuursan weydee
Haddii ay mur kugu tahay
Mid kalaa waxay tidhi
“Hunguriga la miriyaa
Wax ka weyni maaf noqoy”
Haddaad taa ka murantoo
I tidhaahdo maan maqal
Mid kaloo la midaboo
Macnahaa siddaa tidhi
“Halkay maalin dacawadu
Macda neefka ku cuntaa
Macaluushu dhigataa”
Haddaad malabka boolliga
Muudsoo is qari tidhi
Murti-yahan horaa yidhi
“Macal cune ma dhuuntee
Kollay muuqan doonee
Adigoo cir maraqiyo
Candha saabka soo muday
Malkadiyo kobtaad tiil
Inta uu ku muruxsaday
Miish-miishka kugu saday
oo meesinkaagii
Maqal daaqsinkeedkiyo
Meel ay ka muuqdaan
Barqo-dhereg madiixeen
Oo weliba moodiyo
Martabiyo salaantuna
Dheertahay maddiiloow
Inta laga mishiiqsado
Adna aad u muhatee
Askarteenana milicdiyo
Mirta dhexe ku heeggana
Dhaxan aan maryuhu celin
Bil dhan waxay masruuftaan
Maalin qayl wasiir iyo
Waxan maati korinayn.
Adna moodhadh qaaliya
Dawga boodhka miidhana
Waadigan ku marayee
Hadduu maanku kugu yidhi
Miskiin bay ku yaallaan
Misko mudane fuulaa
Maah maah kala tidhi
Malko aar fadhiyi jiray
Masallaha atoor dhigay
Madaxtooyadaydii
Murdisooy lagaa yaab
Ama waa la muuqdaa
Ama waa la maqanyee
Mus-danbeedyo badaneey
Magac iyo marwaad buu
Xil macaan ku leeyee
Manfacada ka jeceleey
Halka dollar maadhiyo
Midho iyo macaash yaal
Moolkii barmuudiyo
Haddii uu mariikh yahay
Miidaamo dhega loo
Isu sii maqiiqdaay
Hadba halis muquurtaay
Ummaddii midaysnayd
Yaa kala maroorshee
Toban moos ku kala xidhay
Taladii majiiraha
Muddo dheer ku taagnayd
Mayalkeedii yaa rogay?
Majaraha winiin iyo
Luqun dhaaftay madaxiyo
Meeraysi fool-waa
Iyo maaruq yaa baday?
Mucsur baad ka joogtaa
Miyirkiyo hanweynida
Waxad maar ku gadataa
Dahabkii malaasnaa
Dalku kaan u madhanee
Dhibta aan u mudanee
Maryo dhiigle loo furay
Kunka madina loo qalay
Loo galay mannaayaha
Ma-huraankii weeyee,
Ciyi iyo muquuniyo
Leg maqaaxi yaalliyo
Waxan lagu masuugayn
oo lagu mulkiyi karo
hadal iyo mudaahano
ama meel madaw iyo
mugdi lagu xaraashoo
mug-yar baad ka dhigateen
Waa Maxay ka miisiyo
Ku muraadsadaaydani?
Waa Maxay man dhaafsiyo
Shisheeyaha Ku maashani?
Male-gelinta waayaha
Masanuuninteedii
Waxay tidhi war moogeey
Maalmahan danteenii
Mukur baa ka taliyoo
Sida ruux la maray buu
‘‘Maya’’ ‘‘haa’’ ku ladhayaa
Marka uu margado buu
Runta sii murginayaa
Miciyuu dirsanayaa
Mixnad buu hadhsanayaa
Makri buu barkanayaa
Hadba boogo malaxliyo
Milil jira guntaasuu
Dusha sare mariidiyo
Maaleey ku dhayayaa,
Masas buu dhaqanayaa
Malmal baanu shidayaa
Hadba good is maray buu
Rajo maax ku sabayaa
Shil mirtuu ka baqayaa
Sharna wuu martiyayaa
Madallooti dhacayuu
Muska reerka dhigayaa
Cidda maasha saraysaa
Magli loo lisanayaa
Xaqa soo mutuxan buu
Kun maxaadh ku mudayaa
Hadba dhiil u madhiyuu
Muddo dhaaf ku lulayaa
Masalooyin ugub buu
Hadba moofle jarayaa
Rag masaasad jeceloo
Moroh looga talay baa
U madiidin noqotoo
Wax ku meel marsanayaa
Rag muraayad haaddaa
Gaajada ku soo maqan
Ka miliilicaayaa
Qandaraasyo miino ah
Iyo mooshin dhuuniya
Lagu yidhi miskeedshoo
Loo daa muggaabada
Mukurkiina guushii
Hadba meeris sii guur
Madihiina faalali.
Ninka weel muggiisii
Intuu buuxshay miijiyey
Weligii ma mahadshoo
Wax badsiga wax beel maag
Miyigiyo magaalada
Marka aad dhex maraysaan
Ee ay kuu mashxaradaan
Haddaad mooday maamuus
Waxay kuu maldahayaan
Macno-yare macaan jecel
Malafsade maroorsade
Mamac-qabe magaagsane
Ku muraadso derejada
Hortaa qaar na maax tiray
Oo naga macdaarsaday
Saddex magac ilaahay
inay suuqa meeraan
Oo wada madaw yiin.
Waxay maansadaydani
Mudducigi ku leedahay
Weligiinba miliqsada
Weligiin ma-guurtada
Milyan iyo kun dhaafsada
Weligiinba muudsada
Maarkaha dhimbiisha ah
Madadaalo gudhasiyo
Is moodsiiska beenta
Weligiinba mehersada
Rabbigay ma moogoo
Miil kama qarsoonee
Weligiin ku mahad-naqa
Moohaarka duufka ah
Weligiin miskiidada
Salaad reer magaaliyo
Sujuudii munaafaqa
Xusulada ku soo muda.
Mar uun bay war-moogeey
Ummadayda maahsani
Miiraami doontaa
Maalin aan fogeyn bay
Irbadaha ku mudanee
Miyirkeeda doorshiyo
Falka loo maleegiyo
Sixirada muqleeyiyo
Minka inan-gumeedka
Laga meerin doona
Maalin aan fogeyn baa
Iyadoo mudduciyoo
Muruqiyo awoodlihi
Ragga mooro-doogee
Madhshay xoolaheedii
U midoobi doontaa.