Wasiirka Wasaaarada Caddaaladda Somaliland Mudane C/risaaq Cali Cabdi ayaa ka warbixiyey Mashaariic horumarineed ee Madaxweynaha Somaliland Md. Muuse Biixi Cabdi uu amray in laga hirgliyo Gobollada Bari ee Waddanka ,gaar ahaan Sanaag iyo Badhan.
Wasiirka Caddaaladdu oo ka hadlay socdaal uu dhawaan uu ku tagay Gobolka Badhan iyadoo uu xusay in aanay jirin wax mashruuca oo ka fulay gobolkaasi ,gaar ahaan magaalada Badhan amarka madaxweynaha ka hor.
Wasiirka Caddaaladdu wuxuu sheegay in shalay ay shirkado waddani ahi ku kala guulasteen mashaariic xukuumaddu ka hirgalinayso gobollada Sanaag iyo Badhan, waxaanu xusay inay dawladdu daba-geli doonto siday mashaariicdaasi u hirgalaan.
Wasiirka Caddaaladdu wuxuu sharaxaad kooban uu ka bixiyey goobaha ay mashaariicdaasi laga hirgalinaayo oo ay ka mid yihiin; degmooyinka Laas qorey,Dhahar,Xiin-galool,Ceel-buh, Badhan iyo Yubbe, waxaanu intaas ku daray in mashaariicdaasi ay iskugu jireen horumarinta adeegyada bulshada.