Macaan-jecel: Maanso Ka Tirsan Miimleyda Cusub!
Maansadan magaceeda waxa la yidhaahdaa Macaan-jecel, waxaana curiyay Siciid Maxamuud Gahayr (Hargeysaawi), waxa ay ifka u soo baxday 20kii March 2017ka. Waxa ay daba-socotaa Miimleyda ka curatay maansadii Mudduci ee uu tiriyay Abwaan Xasan Daahir Ismaaciil (Weedhsame). Waxa ay is-barbardhig ku samaynaysaa beri ay xayawaanku madaxweyne ka dhigteen bahalka maska iyo maamulka maanta talada haya.
Iyada la safan dhan ka mid ah labada kooxood ee hal-abuurrada ah waxa ay tidhi:
Mahuraan Abwaanow
Weedhsamow mudnaan baan
Kugu soo majeertee
Murtidaadi laabtiyo
Maskaxdaa ku reysee
Haddii aad mudduci culus
Ku bilawday miimkii
Cabdillaahi mudhay oo
Marag kugu labeeyaan
Mahad weyn dul-saaroo
Murtiyahan Awaariyo
Marwo Deeqa Nuux iyo
Maansayahanka Daah iyo
Maskax-maalladeennaan
Ku milgeeyay heestee
Adna Maxamed-Iidow
Macaan-jeceshan ugubkaa
Sooyaalka mudhay iyo
Maguuraanka keydkiyo
Mareegaha xuskaa geli
Wax la yidhi makhluuqiyo
Mayeedhaanka nool iyo
Inta magac dugaag iyo
Ku midawday kayntoo
Madar iyo shir joogaa
Yidhi maalin talo guud
“Madax yaan ka dhigannaa?”
Dabadeed maskiibaa
Yidhi “Murashax baan ahay
Waxan ahay masuul geya
Maamulkiyo hoggaankoo
Haddii maandhe lay xulo
Majaraha xilkee qaran
Maansha’e riyaaq baad
Ku mushaaxi doontaan
Magan waan tixgeliyaa
Marti waan u roonahay
Maxastiyo saboolkaa
Hasha maali doonoo
Haddii ay maxkamad tahay
Meerisyada sinnaantaan
Ku macaamilaynnaa”
Inta moog warkiisoo
Muraaqooday xiisii
Miiggane atooroo
Wuxuu maaruq geystiyo
Manaayaba ogsoon baa
Kacay maalintaasoo
“Maqla” weedhan buu yidhi
“Inaad tahay mur iyo halis
Iyo maalay noo daran
Maanku wuu ogsoonyee
Adigoon sidii malab
Isu kay macaanayn
Aan mahadhadaadii
Maqashiiyo uunkee
Horta mee bakaylihi?
Mar dhawayto sawtaad
Ma-naxow jaqayseed
Waaxyixii mirateed
Miiratee raqdiisina
Magaalada dhex madhan tahay
Yaa musiibadaas iyo
Mawdkiyo sharkaa falay
Micidaadu adigoon
Madax noo ahayn bay
Mudday waaxyahaygee
Haddii aan malaaq iyo
Madaxweyne kaa dhigo
Saw inaad na madhisiyo
Maangad kaama fili karo”
Muusannaw abeeskii
Wuxuu yidhi “maroor iyo
Matag weeye hadalkuye
Waxan ahay nin muumina
Manfacayga soortii
Maadha iyo dooggiyo
Manka geedda weeyaan
Muslin illiga kuma dayo
Maan mirannin dhiig abid
Macmalka iyo eedduna
Masabiddid xun weeyaan
Mawd lama huraayee
Mudanyahaw bakaylii
Malaggiisi baa galay
Maalig baana oofsaday”
Kolkii laga mashaawiray
Xaajadii markaa tiil
Magacaabiddii guud
Maskii talada loo dhiib
Maalmo dhawra dabadood
Midabkuu lahaa iyo
Muuquu lahaan jiray
Maradii ka qaad oo
Maski dhaqannadisiyo
Muuji kuu ahaan jiray
Miskiinkii boqnaha goo
Musuq maasuq fara-baday
Makastiina naafee
Bulshadii midaysnayd
Kala-miiq dhammaantood
Mirirkiiba wuxuu yidhi
“Mijo-yare atoorkani
Waa mucaaridkaygee
Madaxiisa soo jara
Kaan maamulkayga
U midiidin noqonayn
Waa inaad maxbuus iyo
Ka dhigtaan madluufoo
Mustaafuriya ruuxii
“Maya” dawladdaay dhaha”
Metelkiyo warkaygaas
Wax la midaba saakana
Malyuunnada dhulkaygii
Kuwa maanta siistee
Murjinkiyo colaaddii
Marinnada Carbeed tiil
Ka macaash deyaayee
Milatari col iyo guluf
“Mushaaxay” leh ciiddii
Marsadii dalkaygaa
Midigtii la dhiiboo
Minan iyo dhul iyo deyr
Mulkigii xaraash baa
Lagu maal-wareejoo
Wadhatada marraaq iyo
Moofaa la geliyoo
Sicir-barar mug weynbaa
Danyartii murkiciyoo
Maariyo xal loo kaco
Waxa caawa uga mudan
Maxafsiyo xatooyiyo
Mallafsigiyo boobkoo
Waxa maatidaydii
Miranaaya jebis iyo
Miciyii abeeskoo
Kii miciin u fidin-laa
Iyaguu ku maqan yahay
Maamuus-jabkeenniyo
Milge-beelisteennaa
Magac laga deyaayaa
Mudka oo la ruugiyo
“Madhiyaayda” waayadan
Dalka lagu magool tiray
Mahadhadan cusaybkaa
Sidee baan u moosnaa?
Shalay duul madhnaayoo
Macaluul ku soo koray
Magacaabis dabadeed
Maal-qabeenno weeyoo
Milyaneernno waxa jira
Fooq iyo madarad dheer
Muddo kooban seestee
Kuwa macasha weynow
Miidaanka Aakhiro
Maxaa Mawle lagu odhan?
Moqoraysigoodani
Mijo-xaabi qarankee
Moohaarradoodani
Milaygay tif wada noqon?
Durdurka iyo maaxdiyo
Mahwi iyo hadday ceel
Ka cabbaan mir iyo layl
Waxa jira magaag aan
Ku mafsuudin dhereggee
Macaan-jecel harraaddani
Goormay mafsuuddaa?
Madi caanaheedii
Qaar baa ku mamay oo
Hadduu mayayga roobkii
Maansheeyo uunkaba
Waxa loo muhanayaa
Inay maandhe koox qudhi
Mahiigaanka dhuratee
Haddii uu malyuun qado
Toban aan kol miigani
Inay miidda laastaan
Waa meel-dhac yaab-lehe
Murdisadan na guud-sudhan
Iyo maashan nagu taal
Muftiyahaw sidee baa
Miridh loo dabiibaa?
Ma maruuryadadiyo
Murugiyo lurtayday
Maad weli u haystaan?
Mooshin-quutayaashow
Muudmuudsigiinnani
Midho aayantiin liyo
Miid kuuma dhalayee
Mooraha qalloocdiyo
Malluugaha xogtoodaa
Maqan jaalle ila dhawr
Halkan Guji Maansada Muddan iyo Abwaan Daaha Gaas
Halkan Guji Maansada Miisaan Abwaan Bashiir Sacad
Halkan Guji Maansada Miyir Sida Abwaan Xasan Cabdilaahi Ganay
Halkan Guji Maansada Maato Abwaan Ahmed Hassan Ducaale
Halkan Guji Maansada Muusanow Iyo Abwaan Cabdishakuur Qaraami
Halkan Guji Maansada 2aad MaskaxCelin Abwaan Sharmaarke Qaloonbi
Halkan Guji Maansada Milay Abwaan Cabdiraxmaan Haldhis
Halkan Guji Maansada Muwaaddin Abwaanad Amran Sharaf
Halkan Guji Maansada Magansi Abwaan Cali Wadaadyare
Halkan Guji Maansada Midhaale Abwaan Sharmaarke Abdi Laki Qoloonbi
Halkan Guji Maansada Muran Diid Abwaanad Deeqa Nuux Yoonis
Halkan Guji Maansada Iska Hubiya Moqorada Abwaan Farxaan Bawkax
Halkan Guji Maansada Millad Abwaan Maxamed Galaydh
Halkan Guji Maansada Maxkamadda Abwaan Sakariye Awaare
Halkan Guji Maansada Mudaacali Abwaan Daaha Cabdi Gaas
Halkan Guji Maansada Marag Abwaan Cabdilaahi Xasan Ganay
Halkan Guji Maansada Mudduci Abwaan Weedhsame