Gabaygan Lagu maquunee, wuxuu si qotodheer
Ula garnaqsanayaa xukuumada S/land isagoo ku
Hadlaaya afka inta aan codka lahayn ee dulman.
Waxaanu tilmaamayaa qaar ka mid dhaliilaha jira
badan iyo sida qaybinta umadii isku isku noolka
iyo wada noolka ahayd loo qaybshay iyo sida aan
loogu sinayn xaquuqaha mid cadaaladeed, mid shaqo
iyo mid dhaqaale toona.
Curiye: Omar A. Abdi
Epost:omar.a.abdi@gmail.com
Gabayga magaciisu waa: LAGU-MUQUUNEE
Taariikh: 08.04.2019
Mihnad gabay ragbaa macaliin miigan ku ahaaye
Dhaaxay tix miisaan leh culus idinku miiseene
Dhaaxay mulaax iyo tirsheen maanso nabadeede
Mowluhu godkii hawga dhigo hoy munaasiba’e
Haday moosaskii nool yihiin uma muraadeen
Maqaarkay uma dhaansadeen maalingaal socode
Maantana midaan tirinayaa wayska may tidhiye
Indha melekle aarkiyo badaa meyl u kala goosha
Marinkooda lama joogsadiyo muqabil-koodiiye
Sunaamiga makala iyo sidii mowjadaha seexsha
shacab baan markii ay kacaan maare celineyne
Jeel lagu maqiiqiyo askeri kama macaashaane
waa mowjadaan aan laga hortegin cidina maareyne
Micnahooda ruux garanayaa waw miyiriyaaye
Isha midhigle eegmada maldahan shaarubaha miiqan
Dibnahaa mishiiqsiga war yari hadal ka maagaaya
Dhegta maqal u taagani waxay maagantaa jira’e
Shacab maagey maareyn xalkii waa malkada dhaafe
Masuul dhaba milgaha dowladnimo Jacinda mudane
Waataa mushkuladdii cunsuri geystay maamuli’e
Shacabkuna mid qudha buu uyee maaha reer hebel
Macbuudkeen hawada map ku qore magac illaahaay
Ny Zealand Mahad baan u diri waana mudan yiine
Afartaa ma hiigaan curtiyo maayadaha xiin dhe
Miiraale hooriyo gudgude mooshinkii qaran dhe
Xadhig maran xaq iyo been murmiyo xaajo kala-maan dhe
Dood duu xaqluu soo marsaday run iyo miisaan dhe
Runbaa lagu murmaa beena waa laga mashiiqdaaye
Dadkan uu masuulkii dayacay ee dhib u maleegaayo
Madaxweyne iyo xaakin iyo madaxda dowloo dhan
Maareeyayaal iyo intii magac wasiir sheegta
Inta ay mulkiilaha yihiin magac ku ceeshaaya
Ee ay maxkamaduu yihiin mobil prepaid ah
Ee maahirtay wada lahayd keli nin maalaayo
Malaayiina qaar lagu xukumi marag la’aan eedba
Alleylee masiir gobanimaa mowqifkeed lumaye
Dib baa loo mirtaa xaajadaan maanku taabicine
Wax garaadka lagu mayracaa maalmihii tegaye
Maantiyo wixii shalay dhacaa laga minguurshaaye
Mulkiilaha yaqaan baa baryahay magan la tuugaaye
Marka aad maluugaha heshaa talo la maalaaye
Markaasaa wixii maanku tebi tacab la muujaaye
Dhalaankaa la maaweeliyaa maalin geediga’e
Maandhow ka soo carar dhurwaa lagu mashaysiiye
Guudkaabay naga maamulaan qaar muraad lihi
Ishi maalintaad tidhi xornimo dumise mooskiiye
Muran kamaydin celin doodihii miis la soo dhigaye
Inaad maamul goboleed tihiin may kamay odhane
Madaxaabad laalaadisay iyo Muuse luquntiiye
Malkadii berbera qaar ayaa deyr ku meersadaye
Hawadiina meeshay martaan muran ka taagneyne
Waa maangad qarankii mudnaa meesha kaba saare
Xadhig maran xaq iyo been murmiyo xaajo kala-maan dhe
Dood duu xaqluu soo marsaday run iyo miisaan dhe
Hadal laba mino leh beena waa lagu mesaalaaye
Maroodaan afkaa gelinayaa Layna marin mayo
Sadexdii Millennium https://no.wikipedia.org/wiki/Millennium qarnaa maanta kowsadaye
Ma qarsoomo shaynaba casrigan meedhiyuu jiro’e
Mar na tidhi malaayiin horaa deyn u maqan maalka
Marna tidhi malkadu waa kiroo jeer hadana maaha
Afartaa ma hiigaan curtiyo maayadaha xiin dhe
Miiraale hooriyo gudgude mooshinkii qaran dhe
Laba madaxle boqorow nin yidhi meel mugdiya leylka
Isma odhan warkaagii la maqal male’se beenoowye
Maatadatan maalkeed la dhacay maamo iyo caydi
Inta ay mataanaha jebsheen odayo maan gaabi
Oo ay marqaa uga fureen kurayo maacuuna
Ayay hadal macnoba aan lahayn idin mashaysiine
Xadhig maran xaq iyo been murmiyo xaajo kala-maan dhe
Dood duu xaqluu soo marsaday run iyo miisaan dhe
Muraayado cagaaraad indhaa saartay madaxiiye
Waa meel saxaare ah halkaad mooday doog baxaye
Mashruucyaan ka wada beerayaa aradka maansheeya
Waa mala’awaal beena iyo marin habowsiine
Dar baan maal aduunyaba lahayn cidina maareyne
Macaluulna qaarbaan dheryaha saarin meel dabahe
Intii mudan biyuhu waa waxaan cidi ka maarmayne
Oon baaba loo madhanaya oo meyd dad baan dhaqane
Dood duu xaqluu soo marsaday run iyo miisaan dhe
Jalfis marinka lama teediyiyo miino qaatilahe
Maamuuska dowliyo haduu lumo mar miisaanka
Oo aan xeerar lagu maamuleyn qoysna lagu maalo
Marso iyo intaan loo sinayn dow la maro meel ah
Muquunana rag baa loo bixshiyo ruux muwaadina’e
Miisaana qaar baa la sudhay muhasho diinaare
Xadhig maran xaq iyo been murmiyo xaajo kala-maan dhe
Dood duu xaqluu soo marsaday run iyo miisaan dhe
Mudanow ninkaa Geele Arab moodkii laga qaaday
Isba waa ka maqan yahay aduun boqol maalaayiine
Inuu sida muwaashiga nin qool maran u soo soohdo
Oo aan maxaa dhacay la odhan maanku gadan waaye
Runbaa lagu murmaa beena waa laga mashiiqdaaye
Dhawr haloo jawaab mudan hadaan mar idin weydiiyo
Markii uu Abwaan muhindisee tiriyo maansooyin
Ee uu wixii muuqda iyo taabto milil hoose
Ama Macalin uu danaha guud deris ku miisaamo
Ee door muwaadini wax jira uu dadka u muujo
Isagaan dil iyo maagis iyo geysan dakhar muuqda
Oo aan maal dadweynaha ka dhacin sida masuuliinta
Wax maxkamadi jeel ugu dirtaa aan denbna muuqan
Jawaab mudan ayuu shacab rabaa aan mugdi lahayne
Dadku marag ma doon waa ogyiin maakhadaa jira’e
Bal macnee adaa alif wax liyo muu lahay yidhiye
Dir ma nihin adaa maalin hore muusanow dhigaye
Oo yidhi suldaan Maxamed xidha meel ayuu tegaye
Misna waanu nahay loo hadeer xoojin murankeede
Maantiyo hadmaad waalantiin shalayto maandhooyin!
Mulki qaran xaqsoor baa mudan maamul dowli ahe
Qandaraasyo leylkii mugdiga meelo lagu qaybsho
Aan marin dariiqay mudnayd maalin la arkaayo
Musuq-maasuq eex inaad hantida cid ugu miisaanto
Darna aanay miis shuba ka helin weliba aad maagto
Iyadana jawaab mudan ka bixi beeni waa madhaxe
Hadal aan run lagu miisanayn malaha miisaane
Wixii uurka kaa miranayaa ficilku muujaaye
Madaxtooyo aan loo sinayn maamul iyo dowlo
Militaari la qaybshoo qabiil lagu maleelaayo
Amnigoo midkii dhowrilaa mirayo leyl reero
Mudan iyo mageyniyo dhalaan kama mildhaawaane
Muusow ilbaad soo marmaran aan wax kaa mudine
Qorax maalin duhur joogta baad meedey leedahaye
Mugaabada cankoo muuqda baad moogi leedahaye
Wax hortaa ka muuqdaad natidhi maandhaw maan magale
Ujeedada maldahan waayo badan miiqde xeegmilada’e
Soco midho waxaad muhindisaan miiran shacabkiiye
Hadduun baa muraadkiin dhabiyo maarti loo dhacay
Xadhig maran xaq iyo been murmiyo xaajo kala-maan dhe
Dood duu xaqluu soo marsaday run iyo miisaan dhe
Laf murkacatay baa lagu kabaa maydhax iyo geede
Iimaanka oo miiqmay baan maaro loo heline
Inta madax nin sheegtaa arlada milil abuuraayo
Ee aan macbuud laga baqayn waa mushkulad weyne
Dar masaajidkii soo dunshiyo mowlacyada Eebe
Quraan bay dadkow marinayaan diidyey maqalkiiye
Warkoo mid ah runtaan muran lahayn talo muhiimkeeda
Haddii uu qabiil kugu mudoo doqon ku meelaysto
Oo aydaan dantiina u mid noqon lagu muquunee.
………..Wa bilaahi tawfiiq………..