MAXAA SABABAY TAYO XUMADA WADOOYINKA CAASIMADA? YAASE GACANTA KU HAYA MAAMULKA WARSHADA NAAS-ABAARSO SITE.
Q. 1aad
“Walee qalin daraalaha, Danbi shacabka laga galay, Kama qariyo wadhatada
Walee qoonka mililka leh, Qarka sare ma dhaydhayo” IHN. Abw. Gaariye.
Taariikh Kooban Qalabka Wadooyinka Lagu Dhiso ee Naas-abaarso Site Hargeysa.
Bishii October 2015 ayaa qalabkan laga soo dajiyay magaalo ganacsiyeedka Tog-Wajaale. Shirkad wayn oo laga leeyahay dalka Ethiopia oo magaceeda la yidhaa METEC ayay dawlada hoose ee caasimada hargeysa kasoo iibsatay qalabkan iyadoo kaashanaysa Wasaarada A. Dibada iyo Wasaarada A. Gudaha ee Somaliland. Qalabkan ayaa lagu soo iibiyay lacag dhan Laba Milyan iyo Sagaal Boqol oo Kun ( $2,900,000 ).
Hindisa ah in dawlada hoose iibsato qalab wadooyinka lagu sameeyo waxay ahayd talaabo loo qaaday dhinaca horumarka, Golaha Deegaanka Caasimada Hargeysa way ku amaanan yihiin keenista qalabkan oo lahaa laba ujeedo oo muhiim ah, waa ta koowaad in la helo wadooyin tayo leh oo si casriya loo dhiso maadaama Caasimadu tahay muraayada Qaranka soona jiidata indhaha bulshada. Ta labaad waxay ahayd in dhaqaalaha adag ee dawlada hoose ku kiraysato shirkadaha wadooyinka sameeya ka maaranto.
Horaantii bisha Sept 2016 ayaa la tijaabiyay, kadib mudo ay qaadatay rakibaada qalabka, waxaana furitaankeeda xadhiga ka jaray M.weyne ku xigeenka Somaliland. Tan iyo maalintaas Shacabka ku dhaqan Caasimadu waxay rajo fiican ka qabeen inay ka bixi doonaan wado xumada ragaadisay caasimada, maadaama cashuurtii dadweynaha laga soo iibiyay qalabkan wadooyinka lagu dhisayo, dawlada hoosena ka raysan doonto kharashka badan ee ay kusoo kiraysan jirtay.
Nasiib daro, may dhicin taasi, dhawr shayba, waa ta koowaad Golaha deegaanku may abuurin xeerkii ay ku shaqayn lahayd Shirkadu, waa ta labaad maamulkii wax gacanta loo galiyay shirkad private ah oo macaash doon ah oo magaceeda la yidhaa (MEC) Management Engineering Company, Shirkadan Mayor Solteco ayaa heshiis lagalay, Golahana lama horkeenin, BID laguma bixin. Waxa is waydiin leh sababta keentay qalabkii cashuurta dadweynaha laga soo iibiyay in si private loogu shaqaysto.
Lasoco Qormad danbe.
Waxa idin la wadaagi doonaa Shares shirkada MEC sida loo kala leeyaha, Naas-abaarso Site waxa laga dhigtay meel Lacagta lagula baxo shirkadan qarsoodiga ah ka sokow waxaan idiin soo bandhigi doonaa kharaska ku baxa Site, mushaharka shaqaalaha, daamurka iyo shidaalada, xagay martaa laga qaado meelaha ka baxsan wadooyinka sida meheradaha, kaalmaha iyo lacagta dadweynaha laga qaado ee contribution ah, ugu danbayn qalabka ay dawlada hoose soo iibsatay hoos ma u dhigay lacagtii lagu kiraysan jiray mise lacag ka badan ayaa ku baxda?
Alaa Mahad Leh.
Maxamed Gacayte.